Peusan Keu Putroë

Kutru Baguna Ateuh Bak Magoë

Teungoh Seumeuproë Ngen Tiyông Batèe

Rasa Kôp Meuchén Kayém Lon Sampoë

Sira Lôn Ujoë Keunoë Lam Ritèe

Hajat Lam Angan Meunan Keuh Bagoë

Masa Saboh Roë Geutanyoë Angkèe

Pakri Ngen Kiban Pulan Ta Puwoë

Usaha Keudroë Sapat Lam Jurèe

Beuthat Pih Ramée Jamèë Yang Peutoë

Hana Lon Hiroë Seubab Ulôn Thèe

Meumacam Lagam Meureugam Jaroë

Gaya Ceumakoë Geujak Peuteuntèe

Bacut Tan Hireun Di Lëun Nyak Putroë

Ureung Jak-Jak Woë Nuga Ngen Alèe

Pulom Na Geumée Sanée Rampagoë

Keu Bungöng Jaroë Na Yang Jôk Bajèe

Bèk Sagai Tatuëng Baluëm Meu Asoë

Beugot Jaga Droë Hai Bungöng Kumbèe

Cukóp Bahaya Sengkira Laloë

Keubit Séep Rugoë Leuh Keunöng Tipèe

Kadra Meulumpat Meunan Trôh Sumboë

Ji Peusiblah Droë Bèk Keunöng Singkèe

Mubèk Jeut Layôh Sungkôh Lam Sagoë

Teulah Bak Dudoë Sidroë Lam Seudèe

Pajôh Bulukat Meuhat Ngen Tumpoë

Peutuah Uboë Seunijuëk Gurèe

Saboh Peuneusan Simban Meungandoë

Haba Seuleusoë Öh Nöe Keuh Dilèe

Subhan Droe Teuh