Rasa Meupingkui

 Geu Lombang Laot Riboet Oh Senja
Angen Utara Jipoet That Dirui
Teu Duek Teutahoe Teupuroe Lara
Su'um Lam Dada Ban Kenong Apui

Tapeuhah Payong Oh Tutong Teuka
Yub Kayee Raya Tempat Meu Dirui
Bungong Lon Sibu Luhu Ka Nyata
Jinoe Ka Mala Hama Jak Peurui

Bak Baneh Bakat Seu Neulhat Unja
Aron Meubanja Lam Anoe Gasui
Harapan Bicah Teuplah Lam Dada
Awai Gob Jakba Ija Meunengui

Sampoe Keuh Hate Kande Lon Damba
Bungong Lon Jaga Kana Soe Engkhui
Ka Gadoh Haroem Kumtom Ie Mawa
Meu Ubah Rasa Meube Sang Hangui

Keupacang Ambe Kaye Bak Dama
Cabeung Bak Bangka Keu Arang Apui
Gaseh Teuperoe Teulanjoe Haba
Lam Siklep Mata Meu Ubah Ka Phui

Geulumbang Laot Meubalot Faja
Bicah Meubusa Lam Anoe Gasui
Ohno Peutumuen Bayeun Lam Cintra
Kapatah Seungka Han Jeut Le Tangui

Jeuneroep Ta Glong Beukong Meubanja
Sinthop Beu Teuga Cabeung Bak Seutui
Mandum Ka Gadoh Teuploh Bak Punca
Troh Hate Dinda Bak Luka Tacui

Jinoe Ta Jalen Ta Panteng Cinta
Ngon Sidroe Duda Gampong Lhok Seutui
Mandum Ka Sirna Masa Bahgia
Wate Uroe Kha Tan Pat Meudirui

Reudok That Hitam Lam Awan Mega
Angen Pih Teuka Bule Teuh Sang Rui
Oh No Keuh Sampoe Rampoe Lon Puta
Meu'ah Antara Nyoe Salah Meu Sui

 

 Saiful Antara